Mysansar.com
विचार नमिलेका वैद्य समूह अलग्गिएपछि अब चाहिँ माओवादीभित्र केही विवाद हुँदैन होला भनी सोच्नेहरुलाई आजको घटनाले गतिलै झापड हानेको छ। आज हात हालाहाल र कुर्सी हानाहानसम्मको स्थिति उब्जियो- प्रधानमन्त्री बाबुराम र अध्यक्ष पुष्पकमल दाहाल समूहबीच। होहल्ला र कुर्सी प्रहारका बीच भागदौड मच्चिएको थियो बैठकमा। हिजोसम्म लडाकुले हिसाब मागेपछि स्थगित गर्नुपरेको बैठक आज चाहिँ यही महाभारतका कारण स्थगित गर्नुपरेको छ। महाभारत यस्तोसम्म मच्चियो कि प्रधानमन्त्री र प्रचण्डसमेत यसबाट अछुत रहेनन्। प्रधानमन्त्रीलाई हात हालियो, प्रचण्डलाई कुर्सीले लाग्यो।
विस्तारित बैठकबाट निस्केको कार्यकर्ताले दिएको जानकारी अनुसार आफुमाथि चर्को प्रहार भएपछि प्रधानमन्त्री भट्टराई गुटको अन्त्य भयो भन्ने तर हामीमाथि पेल्ने म बैठकमा बस्दिँन भनेर अध्यक्षसित अनुमति लिई हलबाट हिँड्न लागेका थिए। तर प्रचण्ड पक्षका जनार्दन शर्मा, हेमन्तप्रकाश ओली र अखण्ड सुदुरपश्चिमवाला नेता लेखराज भट्टले प्रधानमन्त्रीलाई हातै हालेर समाते।
त्यसपछि हाम्रो नेतालाई किन हात हालियो भन्दै हलबाट अन्जना बिशंखे समूहका कार्यकर्ताले तीन वटा कुर्सी प्रचण्डतिर फाले। कुर्सीले टाउकोमा लागेपछि सेना र प्रहरीले सुरक्षाका लागि प्रचण्डलाई समातेर बाहिर लगे।
भागदौड मच्चिएर बैठक स्थगित भयो। अनि विवाद समाधान गर्न बैठक स्थल बाहिरको पर्यटन बोर्डको हलमा पार्टीको पोलिटब्युरो बैठक बस्यो!
